KORONADAL CITY – Naglab-ot sa anum ka mga preso sang South Cotabato Provincial Jail ang nag-positibo sa illegal nga droga sa ginpatigayon nga random drug testing.
Ini ang ginkumpirmar ni Provincial Jail Warden Felicito Gumapac sa interbyu sang Bombo Radyo Koronadal.
Suno kay Gumapac, ginahibalo na nila kun sa ano nakasulod sa jail ang illegal nga droga sa pihak sang ginapahugtan nga pagbantay sa mga ini.
Apang dako suno pa ang posibilidad nga may mga paagi ang mga preso sa pagpalusot sang droga sa sulod sang jail apisar nga bawal sa gihapon ang pagbaton sang bisita.
Bangud sa natukiban, pagachekyaron na sang maayo sang mga guwardiya ang ginapasulod nga pagkaon kag mga gamit sa jail agud nga indi malutsan sang illegal nga droga.
Ginpasiguro man ni Gumapac nga kun may preso nga ginapangduha-duhaan nga nagausar sang illegal nga droga ang gilayon nga igapaidalom sa drug test agud nga makumpirmar ini.
Nahibaluan nga indi lamang ini ang una nga tion nga may mga preso kag jail guard sa provincial jail nga nag-positibo sa illegal nga droga.
