KORONADAL CITY – Yara na sa luwas nga kahimtangan ang duha ka bata makaligad malumos ang mga ini sa probinsya sang North Cotabato bangud sa mga pagbaha.
Base sa impormasyon nga nakuha sang Bombo Radyo Koronadal, isa ka 3 anyos kag 7 anyos nga mga babaye ang mga biktima kag lunsay residente sang Brgy. Kisante sa banwa sang Makilala.
Sa impormasyon nga nakuha sang Bombo Radyo Koronadal, nagatabok sa kahoy nga taytay ang mga biktima sa tion sang mabaskog nga pagbubo sang ulan sang nagluntad ang insidente.
Maayo na lamang na-rescue gilayon ang duha ka mga lamharon kag naka-confine na subong sa isa ka pribado nga balay-bulolngan.
Suno sa Provincial Disaster Risk and Reduction Management Office, nagsaka ang lebel sa tatlo ka suba kun sa diin ang Bulatukan River ang nakapagkit sang pinakamabaskog nga lebel nga tubig.
