KORONADAL CITY – Yara na subong sa kustodiya sang mga otoridad ang 5 indibidwal makaligad nadakpan nga nagapatigayon sang ilegal nga bulang sa Sitio Lubia, Brgy. Basag, sa banwa sang T’boli, South Cotabato.
Kun madumdoman, isa sa mga barangay sang nasambit nga banwa ang pinakauna nga nakapagkit sang positibo nga kaso sa covid-19 sa probinsya kag bag-o lamang nakarekober sang damlag lang.
Suno kay Plt. Renjun Bagaman, public information officer sang South Cotabato Police Provincial Office, hugot nga ginadumilian ang anuman nga pagtililipon sa subong sa bug-os nga probinsya agud malikawan ang paglapta sang virus.
Samtang arestado naman ang isa ka barangay official kag yara na sa kustodiya sang DSWD ang menor de edad nga nadakpan nga nagahampang sang bilyar sa tunga sang Ehanced Community Quarantine sa banwa sang Tupi, South Cotabato.
Ginkilala ang opisyal nga si Roman Balmores isa isa ka barangay kagawad kag ginkilala ang nasambit nga menor de edad nga si alyas Warren kag lunsay residente sang Brgy. Kablon.
Sa eksklusibo nga interbyu sang Bombo Radyo Koronadal kay Police Major Verlin Pampolina hepe sang Tupi PNP, nga ginapanag-iyahan mismo sang opisyal ang nasambit nga bilyaran.
Nagdalagan ang mga yara didto sang makit-an nga nagapadulong ang mga otoridad.
Sa subong, nagapangatubang sa kaso nga disobedience to persons on authority sang Art. 151 ng revised penal code ang nasambit nga opisyal kag iban pa nga nadakpan.
