KORONADAL CITY – Ginpasiguro sang kapulisan nga pagaaksyonan ang anuman nga kaso sang diskriminasyon kag pagpalanakit sa mga health workers makaligad ang nagluntad nga pagsabya suno pa sang bleach sa mata sang isa ka nurse sang St. Louis Hospital sa siyudad sang Tacurong.
Sa interbyu sang Bombo Radyo Koronadal kay Tacurong chief of police Lt. Col. Rey Egos, ginpahayag sini nga indi nila pagapahanugotan nga masakitan kag ma-discriminate ang mga frontliners labi na sa medical sector.
Madumdoman nga sa nasambit nga balay-bulolngan kun sa diin nagaobra ang ginsakitan nga nurse, napatay ang pinakauna nga kaso sang covid-19 sa probinsya sang Sultan Kudarat.
Sa reklamo nga ginpalab-ot sang nurse nga si Earl Sunday Perez, nagbalik anay sa balay ang kaupod sini agud magkuha sang mga gamit bangud didto siya sa ospital matulog.
Magabakal kuntani ini sang kape sa merkado sang ginpalapitan sang pila ka tawo kag ginpamangkot kun sa St. Louis siya nagaobra kag sang ginkumpirmar sini, gilayon siya nga ginsabyahan sang bleach nga naigo sa mata sini.
Gilayon naman nga naghulag ang management sang nasambit nga ospital para sa nagakaigo nga aksyon batok sa mga suspek samtang yara na sa maayo nga kahimtangan ang nurse..
Una na nga nagapanawagan ang LGU-Tacurong nga likawan ang diskriminasyon sa mga health workers sang nasambit nga balay-bulolngan.
