KORONADAL CITY – Posible nga wala sang foul play nga natabo angot sa isa ka bangkay nga nasapwan sa Prk. Blaan, Brgy. Magsaysay, Koronadal City.
Una sini, nakabaton sang tawag ang mga kapulisan angot sa nasambit nga insidente kun sa diin nasapwan sang pila ka concerned citizens ang isa ka bangkay nga nagalutaw-lutaw sa sapa takna alas 9:00 kaina sang aga.
GInkilala ang nasambit nga biktima nga si Kelly Monton, 34 anyos, isa ka mangunguma kag residente sang nasambit nga lugar.
Sa inisyal nga imbestigasyon sang Koronadal PNP, posible nga nalumos ang biktima samtang nagapauli ini makaligad ang pag-inom-inom sini kag aksidente nga nahulog sa creek.
Sa subong nahaya na ini sa isa ka funeral parlor kun sa diin natalana nga igapatigayon ang post-mortem examination sa bangkay.
