KORONADAL CITY – Ginkilala sang Diocese of Marbel ang inisyatibo sang Bombo Radyo Philippines sa pagpatigayon sang coverage sa Sunday masses umpisa buwas, Marso 15, 2020 sa nagkalain-lain nga lugar sa pungsod.
Kadungan ini sa pagpaguwa sang advisory sang Diocese pinaagi kay Bishop Cerilo Casicas, D.D. nga ginaawhag ang mga tumuluo nga likawan anay ang pagpadulong sa simbahan sa pagtambong sang misa, sa baylo magpamati sa radyo kag maglantaw sa Facebook live.
Suno sa obispo, pagtuman man ini sa rekomendasyon sang Catholic Bishops Conference of the Philippines nga makigbuylog sa precautionary kag preventive measures sang gobyerno makaligad ginbatak sang DOH sa Code Red Sub level 2 ang COVID-19 crisis sa pungsod.
Kaangot sini, ginpahayag naman ni Father Romeo Catedral, Vicar 1 sang Christ the King Cathedral, magapadayon sa gihapon ang mga misa kasubong sang naandan.
Apang ginaawhag sa gihapon sang simbahan ang mga tumuluo nga mangin abri sa mga nagapanginahanglan labi a sa ginapangatubang nga problema indi lamang sa pungsod apang mangin sa bug-os nga kalibutan.
