KORONADAL CITY – Magapatigayon sang dako nga vigil ang mga pumuluyo sang Nakhon Ratchasima sa pungsod Thailand makaligad ang makangilidlis nga mass shooting incident nga ginkapatay sang 30 ka tawo kag ginkapilas sang kapin 60 nga iban pa.
Ini ang ginpahayag ni Bombo international correspondent Cleo Rose Jondonero sa interbyu sang Bombo Radyo Koronadal.
Suno kay Jondonero, natalana ini nga igapatigayon sa Thao Suranaree Monument sa palaabuton nga Pebrero 15 kun sa diin pagapangunahan ini sang 10,000 ka mga monghe.
Dugang ni Jondonero, magluwas sa pagpangamuyo, magasindi man sila sang mga kandila kag makigsimpatiya sa mga pamilya sang mga napatay sa nasambit nga mass shooting.
Samtang ginpakigbahin man sini nga anom ka Filipino ang na-trap sa sulod sang Terminal 21 mall agud luwason ang ila kaugalingon sa katungaan sang shooting spree sang napatay nga suldado nga si Jakraphanth Thomma.
Yara suno pa sa duha ka mga Pinoy ang nagpadulong sa department store kun sa diin duha sa ila ang nagtago sa fitting room, may duha man sa stockroom, kag duha naman sa comfort room.
Ginpaathag man sini nga isa ka isolated case ang nagluntad nga indiscriminate firing sang nasambit nga suldado.
