KORONADAL CITY – Ginapatuman subong sang Chinese government ang news blackout kaangot sa isyu sang novel-coronavirus.
Ini ang ginbuyagyag ni Bombo international correspondent Cheche Jadia sa ekslusibo nga interbyu sang Bombo Radyo Koronadal.
Suno kay Jadia nga tumandok sang Tupi, South Cotabato, ginhimo ang nasambit nga tikang bangud indi nila luyag mahibaloan ang mga impormasyon kaangot sa nasambit nga virus.
Sa iya pagpati, posible nga mas madamo na ang napatay sa virus apang wala suno pa ginapaguwa sang gobyerno didto ang matuod nga datos.
Kasubong man suno pa nga ghost town ang mga lugar nga may virus, kag naka-lockdown ang sentro sang outbreak nga Wuhan kun sa diin indi na makaguwa ang mga tawo.
Dugang ni Jadia, gindumilian man ang pag-usar sang social media accounts kun sa diin ginaamat-amat na suno pa nga i-block ang mga VPN agud indi mag-leak ang anuman nga impormasyon nahanungod sa balatian.
