KORONADAL CITY – Nagapanawagan ang bana sang Pinay Domestic Helper sa Kuwait nga si Roda Magtulis kay Pangulong Rodrigo Duterte nga buligan siya nga maistorya kag mapapuli sa pungsod ang asawa sini.
Sa eksklusibo nga interbyu sang Bombo Radyo Koronadal kay Frank Libradilla, bana ni Roda nga residente sang Cauayan, Negros Occidental, nahadlok siya sa kaluwasan sang asawa sini bangud ulihi niya ini nga naistorya sang Enero 2 pa.
Mag-aanum ka bulan na si Roda sa iya nga employer apang apat ka bulan lamang ini nga nahatagan sang sweldo nga nagakantidad lamang sang tag-lima ka libo.
Magluwas diri, Nobyembre pa niya ginreklamo sa agency ni Roda nga First Personnel Incorporated ang sitwasyon sang iya asawa nga wala ini ginapsweldo sang maayo, wala ginapapahuway, ginamaltrato kag sexually harassed pa apang wala ini gin-aksiyonan sang agency.
Sa subong, wala siya sang kontak sa asawa kag nabalaka sa kun ano na ang natabo kay Roda bangud ini lamang ang nakahibalo sa natabo kay Jeanelyn.
Nahibaluan nga masobra duha ka semana na nga nareport nga missing si Roda apang may naguwa nga report nga yara na ini sa accommodation sang agency sini.
