KORONADAL CITY – Ginpakigbahin sang isa ka iloy ang iya naeksperyensiyahan makaligad ang mabaskog nga intensity 5 nga linog nga nagtay-og diri sa siyudad sang Koronadal kadungan sang magnitude 6.9 kun diin nangin sentro sini ang Matanao, Davao del Sur.
Ginsaysay sa Bombo Radyo Koronadal sang 27 anyos nga si Ji-an Diaz, kag nagabusong nga halin ini sa siyudad sang Koronadal kag nagpauli sa banwa sang Tantangan makaligad nagtambong sa birthday sang iya ugangan.
Pag-abot sini sa terminal, nagpanaog siya sa jeep kag tiyempo naman nga nagtay-og ang duta.
Bangud sa nag-uyog man ang jeep nga ginsakyan sini, natumba man siya.
Malapit na suno pa ini sa ligid sang jeep gani gin-usar niya ang iya likod bilang taming agud maproteheran ang iya taguangkan.
Bangud sa insidente nakaangkon ini sang pilas sa iya likod gani gindangat ini sa South Cotabato Provincial Hospital.
Sa pihak sang natabo, nagapasalamat ini sa gihapon nga buhi pa ini labi na ang iya 2 ka tuig nga bata makaligad ang insidente.
Samtang, 17 ka iban pa ang gindala man sa hospital matapos ang pagtay-og sang linog bangud sa napilasan kag nagkalalipong.
Gilayon man nga nakaguwa ang mga biktima bangud minor injuries lamang ang ila naangkon.
