KORONADAL CITY – Wala gin-aprubahan sang Sangguniang Panlungsod sang South Cotabato ang resolusyon nga ginaproponer sang Provincial Disaster Risk Reduction and Management Council nga ipaidalom sa state of calamity ang probinsya bangud sa nabatyagan nga mga linog.
Ini ang gindesisyonan sang SP kadungan sa emergency meeting nga ginpatigayon kahapon sa pagpanguna ni Gov. Jun Tamayo.
Suno kay Tamayo, kulang ang datos nga ginplastar agud madeklarar sa state of calamity ang probinsya bangud madamo sang mga criteria nga dapat lantawon.
Pila sa mga ini amo ang numero sang mga apektado nga mga pumuluyo, agricultural assessment, structural damage assessment, water system kag iban pa.
Apang nagsugot naman ini nga pagapainan nila sang P2 milyon nga pondo bilang bulig sa mga naapektohan sang linog sa North Cotabato.
Suno kay Tamayo, plano nila nga magpadala sang mga tent, pagkaon ukon tubig apang kinahanglan anay ang koordinasyon sa North Cotabato provincial government agud masiguro nga wala sang duplication ukon pagdoble-doble sang mga suplay nga matabo.
Sa Lunes natalana nga magabalik ang paghisgot sang mga opisyal nahanungod sa sini nga isyu..
