KORONADAL CITY- Ginaduso subong sang SoCot Provincial Hospital nga ipaidalom sa stress debriefing ang mga pasyente kag staff sang balay bululngan bangud sa trauma nga dala sang mga pagtay-og.
Kaangot sini, kinahanglan nga matatatapan ang mga pasyente nga apektado sang kalamidad mangin man ang mga staff sang ospital.
Nahibaluan nga naglab-ot sa halos 48 oras nga aktibo kag nagamonitor sa gihapon ang mga katapo sang South Cotabato Provincial Hospital makaligad ang pagtay-og sang magnitude 6.6 nga linog sa dako nga bahin sang Mindanao.
Sa interbyu sang Bombo Radyo Koronadal kay SoCot Provincial Hospital, chief of hospital Dr. Conrado Braña, nangin salandigan sang mga pasyente ang mga staff sang ospital kasubong sang nurses kag mga doktor agud nga indi ang mga ini magpanic.
Samtang apisar mga tawo man ang mga ini nga nahadlok, mas ginapili sang mga ini nga unungan ang mga pasyente sa pihak sang kalamidad.
Kaangot sini, ginpapauli naman ang pila ka mga pasyente nga indi malala ang mga kahimtangan agud nga makapahuway sa ila puluy-an.
Ang pila naman ang nakabalik na sa sulod sang balay bululngan apang ang iban nagakatrauma sa gihapon.
Ginpasiguro naman sang SoCot Provincial Hospital ang hugot nga monitoring sa kahimtangan sang mga pasyente.
