Masobra 80mil nga load nakuha sang Budol-budol suspect sa isa ka remittance center; Pangalan ni Mayor Bendita, gingamit

SURALLAH, SOUTH COTABATO – Padayon nga ginahibalo sang mga otoridad sa pagpamiktima sang isa ka budol budol gang sa isa ka pension house sa banwa sang Surallah nga nagapakilala nga staff ni Mayor Antonio Bendita.
Sa esklusibo nga interbyu sang Bombo Radyo Koronadal kay Police Master Sergeant Eugene Samerano sang Surallah PNP, ginpahayag sini nga nabiktima sang budol-budol gang ang Emily’s Pension House kun sa diin may nagpanawag suno pa sa ila ang nagpakilala nga staff ni Mayor Bendita nga luyag magkuha sang 3 ka kwarto sa nasambit nga pension house, mag-order sang nagkalain-lain nga putahe kag branded nga mga ilimnon.
Suno kay Samerano, makapila ka bes nga nagpanawag ang suspek kag makapila ka bes nga nagpangayo sang load pinaagi sa isa ka remittance center kun sa diin naglab-ot sa halos P83,000 nga balor sang kwarta ang nakuha sang budol-budol gang.
Samtang, dismayado naman si Mayor Bendita sap ag-usar sang iya pangalan.
Suno sa iya, kinahanglan nga madakpan ang suspek agud nga mapahamtangan sang penalidad.