KORONADAL CITY – Nagpaguwa ang Department of Interior and Local Government (DILG) sang kamanduan kaangot sa pagpaninlo sang mga pampubliko nga dalanon sa pungsod.
Kadungan sini, nagpaguwa man sila sang memorandum circular agud mahibaloan kun pila ka adlaw dapat tapuson sang mga lokal nga opisyal ang nasambit nga mandato.
Una diri, ginasiling nga yara sa 45 tubtob 60 adlaw ang deadline sang ahensiya sa mga gobernador kag alkalde sa pungsod agud limpyohon ang mga public roads sa ila lugar.
Sa ekslusibo nga interbyu sang Bombo Radyo Koronadal kay DILG Usec. Epimaco Densing, base man ini sa ginhatag nga mandato ni Pangulong Duterte kay DILG Sec. Eduardo Año sadtong ikaapat nga State of the Nation Address (SONA).
Nagpaandam man ini nga posible nga magapangatubang sa suspensyon ang sin-oman nga opisyal nga indi magatuman sa nasambit nga kamandoan.
