KORONADAL CITY- Ginpasiguro sang pamunuan sang Moro National Liberation Front (MNLF) nga nakahanda sila nga i-activate sa anu man nga oras ang komposisyon sang ila nga peace panel nga makig-istorya sa gobyerno pagkatapos sang eleksiyon sa Mayo.
Ini ang ginpahayag ni MNLF spokesperson Atty. Emmanuel Fontanilla sa sa interbyu sang Bombo Radyo Koronadal.
Suno kay Fontanilla, nga wala sang problema sa ila kun sin-o ang magin myembro sang peace panel sang gobyerno basta maathag ang tinutuyo sa pakig-istorya sa ginaduso nga pederalismo.
Nagapati man si Fontanilla nga wala sang mabudlay nga maistoryhan ang duha ka bahin kun may pag intindihanay kag kooperasyon ang tanan.
Kadungan sini, gin awhag man ni Fontanilla ang tanan ilabi na ang mga negatibo kag indi luyag sa pederalismo nga hatagan sang dalan ang pagbag o sa pagpamuno sang pungsod agod nga maangkon ang madugay na nga ginalauman nga kalinong sa Mindanao kag sa bug-osd nga pungsod.
