KORONADAL CITY- Ginkalipay sang militar kag kapulisan ang pagsungka sa 81 pa nga mga armas sa nagkalain-lain nga banwa sa probinsya sang Maguindanao bag-o ang eleksyon.
Nahibaluan nga 69 ka mga loose firearms ang ginsungka sa 603rd Infantry Brigade sa pagpanguna ni Ltc. Crizaldo Fernandez sang 90th Infantry Battalion sa Datu Odin Sinsuat Maguindanao nga naghalin sa nagkalain-lain nga mga barangay sa nasambit nga banwa.
Kalakip sa mga ginsungka sa DOS Maguindanao amuh ang 22 Shotguns, 4 Uzi, 15 M79, 11 Barrets, 2 Caliber.45 pistols, 4 Garand riffles, 1 Carbine, 4 M16 riffles, 1 M203, 1 60mm mortar, 2 Single Shot Rifles, kag 2 Caliber .38 pistols.
Samtang ginpatigayon naman ang combat clearing operation sang 40th Infantry Battalion sa pagpamuno ni Ltc. Edgar Catu, kun sa diin narekober sa mga banwa sang Rajah Buayan, Sultan Sa Barongis kag Mamasapano ang 1 M14 rifle, 1 M16 rifle, 1 homemade M79, 1 Ingram Sub machine gun, 2 homemade shotguns kag 1 caliber .45 pistol.
Sa Cotabato City naman 7 ka mga armas ang ginsungka sang mga sibilyan sa 5th Special Forces Battalion, Task Force Kutawato, Cotabato City PNP kun sa diin ginakabug-usan ang mga armas sang M14 caliber 7.62mm rifle, 1 calibre Garand rifle, 1 homemade calibre .22 rifle, 2 12 Gauge shotgun, 1 sub-machine gun, kag 1 calibre .45 pistol.
Suno naman kay Maj. Gen. Arnel B. Dela Vega, Commander sang 6th Infantry Division, ang pagkakarekober sang mga armas ang makabulig sa pagpabilin peace and order sa Barangay kag SK elections subong nga Mayo 14, 2018.
