Nagdangat na sa 7956 ka mga indibidwal ang ginbakwit bangud sa asod-asod nga patay-og sa bahin sang Kalamansig, Sultan Kudarat.
Ini ang nangin pahayag ni Mayor Ronan Eugene C. Garcia – Kalamansig, Sultan Kudarat, sa interview sang Bombo Radyo Koronadal.
Suno kay Garcia, nagdeklarar naman ang lokal nga pamunuan sang preemtive evacuation sa mga apektado nga mga lugar samtang nagapadayon naman ang paghatag sang mga food packs sa mga pamilya nga yara sa evacuation centers.
Dugang pa niya, gilayon man nga nagresponder kag nagpalab-ot sang bulig pinansyal ang pamunuan sang probinsya sang Sultan Kudarat sa mga apektado sang pagtay-og.
Ginpahayag man ni Garcia nga posible nga bangud sa Cotabato Trench, isa ka aktibo nga fault line nga mahimo magtuga sang tsunami sa nasambit nga banwa.
Nagpalab-ot man sang pagpasalamat si Garcia bangud wala sang nakaagom sang pilas ukon seryoso nga halit ang iya pumuluyo, samtang nagpanawagan man siya s apubliko nga magpabilin nga alerto kag magsunod gilayon sa mga abiso kag anunsiyo sang lokal nga pamunuan agud malikawan ang mga disgrasya sa tion sang kalamidad.
