Ginakabig sang 6th Infantry Division (6ID) nga isa ka importante nga tikang ang ginhiwat nga peace covenant signing agud masiguro ang malinong kag organisado nga Bangsamoro Autonomous Region in Muslim Mindanao Parliamentary Elections sa Setyembre 14.
Sa interview sang Bombo Radyo Koronadal, ginpahayag ni Lt.Col. Ronald Suscano, spokesperson sang 6th Infantry Division Philippine Army, nga ang pagtambong sang mga sultan, datu, lokal nga opisyal, kag mga lider upod sa militar kag BARMM Police nagapakita sang ila pagpahiusa para mapabilin ang kalinong sa tion sang eleksyon.
Suno sa iya, padayon man ang mabaskog nga koordinasyon sang Armed Forces of the Philippines (AFP) kag Philippine National Police (PNP) pinaagi sa deployment sang dugang nga tropa, suporta sa election security operations, kag pagpatuman sang election gun ban kag Comelec checkpoints.
Ginpahayag man ni Suscano nga padayon ang monitoring sa mga election areas of concern, apang gin-athag niya nga kadam-an sang mga armado nga insidente sa rehiyon may kaangtanan sa personal nga away, family feud kag away sa duta, kag indi direkta nga may kaangtanan sa eleksyon.
Bangud sini, nagalaum ang 6ID nga pinaagi sa padayon nga kooperasyon sang militar, kapulisan kag lokal nga mga lider, magapabilin nga malinong ang kahimtangan tubtob sa adlaw sang eleksyon.
