Nagpa butyag sang pag suporta ang Jail warden sang South Cotabato Provincial Jail para sa palaabuton nga Dugong Bombo 2025. Sa interview sang Bombo Radyo Koronadal kay Ret. Police Lt. Col. Barney Condes, RN, Jail Warden sang South Cotabato Provincial Jail Koronadal. Ginpahayag sini nga dako nga importansya ang pagdonar sang dugo ilabi na sa mga tawo nga nagakinahanglan.
Suno pa sa iya, pinaagi sa pagdonar, ma-refresh kag malimpyuhan ang dugo sang isa ka indibidwal, nga isa man ka pamaagi para sa mas magbaskug ang kondisyon sang lawas. Dugang pa ni Condes, kada adlaw madamo nga mga pasyente sa hospital ang nagakinahanglan sang dugo, apang indi sa tanan nga tion may husto nga stock ang mga blood banks. Amo ini nga kinahanglan ang padayon nga suporta sang publiko sa mga aktibidad nga nagapromote sang mga blood letting activities kasubong sang Dugong Bombo 2025.
Ginpahayag man niya nga ang pagdonar sang dugo isa ka porma sang paghigugma sa isig katawo, bangud ini nga simple nga buhat makaluwas sang kabuhi sang iban. Gani, gin-awhag ni Condes ang publiko nga magpartisipar sa palaabuton nga Dugong Bombo 2025 sa KCC convention center sa November 15, 2025, agud mas madamo pa nga mga pasyente ang mabuligan, indi lang diri sa Koronadal kundi sa bug-os nga pungsod.
