KORONADAL CITY – Tatlo ka drug suspects ang patay matapos nga magbato sa mga otoridad lakip na ang isa ka suno pa kumander sang MILF samtang nadakpan naman ang isa ka barangay kapitan sa ginhimo nga pagserbe sang search warrant sa tatlo ka separar nga Barangay sa banwa sang Lambayong Sultan Kudarat.
Ini ang ginkumpirmar ni PSSUPT James Gulmatico, provincial director sang Sultan Kudarat sa interbyu sang Bombo Radyo Koronadal.
Ginkilala ang mga napatay nga sanday Kumander Randy Kamid nga residente sang Purok Rang-ay Barangay Poblacion kag Jaime Silongan kag Yusop Ibad Mukalam nga lunsay residente sang Barangay Tambak, Lambayong Sultan Kudarat .
Samtang, ang isa ka arestado ang ginkilala kay Musaid Tumagantang Kandatu incumbent barangay kapitan sang Pimbalayan sa nasambit nga banwa.
Suno kay Gulmatico, 16 ka search warrant ang dala sang mga operatiba gikan sa gintingob nga pwersa sang Regional Mobile Force Batallion, Sultan Kudarat PNP kag Lambayong PNP.
Sa subong nagapadayon ang ginahimo nga inventory sa mga nakuha nga droga, drug paraphernalia kag mga eksplosibo sa puluy-an sang mga target sa ginpatigayon nga operasyon.
