KORONADAL CITY – Yara na sa kustodiya sang kapulisan ang 3 ka ginapatihan nga mga notorsyos nga motornapper sa siyudad sang Koronadal makaligad nga maarestar sa ginpatigayon nga operasyon sang mga otoridad.
Sa interbyu sang Bombo Radyo Koronadal kay Police Chief Inspector Arnold Cariño hepe sang Highway Patrol Group sang South Cotabato, narekober sang HPG ang masobra 10 ka mga motorsiklo kaupod na ang isa ka tricycle sa Purok. Looban Brgy. GPS, Koronadal City kaina pasado alas 2 sang hapon.
Suno kay Police Chief Inspector Cariño may nagreport sa ila nga sa nasambit nga barangay ginadala ang mga ginkawat nga motorsiklo gikan sa nagkalain-lain nga probinsiya.
Bangud sini, nagpatigayon sang Anti-carnapping operation ang HPG South Cotabato kag Koronadal City PNP, sa shop nga ginapanag-iyahan ni Bobot Fernandez kun diin nahibaluan nga ginabaligya lamang sa kantidad nga P4,000.00 ang duha ka motor nga ginkalansay na.
Sa subong, ginpaidalom na sa intergasyon si Fernandez labi na kag may impormasyon nga konektado ini sa isa ka Criminal gang nga nagalunsar sang motornapping sa Polomolok, Tupi, Koronadal kag iban pa nga mga banwa sa probinsya.
Madumduman nga sa General Santos City, una nga nadakpan ang mga motornapper nga sanday Ryan Albay kag Jomar Gensuli nga suno pa nagabaligya sang mga kinawatan nga motorsiklo kay Fernandez.
