Ginsungka sang mga residente halin sa lima ka banwa sa Central Mindanao ang 27 ka combat weapons sa 40th Infantry Battalion bilang suporta sa Small Arms and Light Weapons (SALW) Management Program sang Philippine Army sa rehiyon.
Lakip sa mga ginsungka amo ang M14 kag M16 assault rifles, rocket kag grenade launchers, isa ka .45 caliber pistol sa mga opisyal sang 40th IB, nga ginapangunahan ni Lt. Col. Erwin Dumaghan, kag kay Brig. Gen. Ricky Bunayog, commander sang 602nd Infantry Brigade, sa isa ka simple nga seremonya nga ginpatigayon sa Barangay Ladtingan sa Pikit, Cotabato.
Suno kay Major Gen. Donald Gumiran, commander sang 6th Infantry Division, ang mga armas pandigma gin-sungka sang mga residente sang Pikit kag Mlang sa Cotabato, Pagalungan kag Datu Montawal sa Maguindanao del Sur, kag sang Kapalawan sa Bangsamoro Special Geographic Area, sa pagpangabay nanday Bunayog kag Dumaghan.
Ang duha ka opisyal sang Army ang nagabuligay sa pagpatuman sang Small Arms and Light Weapons (SALW) Management Program sa amo nga mga banwa, nga proyekto sang 6th ID kag sang opisina ni Presidential Adviser on Peace, Reconciliation and Unity Carlito Galvez, Jr. Ang programa kabahin sang normalization agenda sang peace process sang Malacañang kag sang Moro Islamic Liberation Front (MILF).
Masobra 700 na ka assault rifles, rocket kag grenade launchers, M60 kag .30 caliber machine guns, 60 kag 81-millimeter mortars, mga shotgun kag mga pistol ang nakolekta sang mga units sang 6th ID sa Central Mindanao halin sang ginpatuman ang SALW Management Program sang division kag sang opisina ni Galvez sang Hulyo 2024.
