KORONADAL CITY- Nasapwan nga patay ang 2 ka mga minero sa isa ka abandonado nga tunnel sa Sitio Tunnel Brgy. Kematu, T’boli South Cotabato.
Sa ekslusibo nga interbyu sang Bombo Radyo Koronadal kay PCI Ramil Villagracia hepe sang Tboli PNP, ginkilala ang mga napatay nga mga minero nga sanday Melvin Calan 22 anyos kag Dino Lugan 25 anyos nga mga residente sang Brgy. Kematu Tboli, South Cotabato nga mga empleyado sang NSC tunnel kun sa diin nagsulod suno pa ang mga ini sa isa ka abandonado nga tunnel sa nasambit nga mining site.
Gas suffocation naman ang isa sa mga posible nga kabangdanan sang kamatayon sang 2 ka mga minero makaligad masapwan nga nagahamyangon kag wala na nagahulag sa sulod sang abandonado nga tunnel.
Kun madumduman nga ginmando sang nakaligad nga bulan sang Setyembre sang Mines and Geo-Sciences Bureau ang pagpauntat sang small-scale mining operations sa nasambit nga banwa bangud sa halit nga matuga sini sa mga minero kag kinaiyahan.
