Patay na sang nakalab-ot sa SOCCSKARGEN General Hospital ang isa ka senior citizen, samtang kritikal naman ang iya asawa, matapos ang nagluntad nga aksidente pasado alas 2:20 sang hapon sa bahin sang National Highway sa Purok Mabini, Brgy. Dajay, Surallah, South Cotabato.
Ang napatay ginkilala kay Felizardo Caban, 70 anyos, samtang padayon nga ginabulong ang iya asawa nga si Vivian Caban, 73 anyos. Lunsay sila residente sang Zone 4, Brgy. Libertad, Surallah, South Cotabato.
Suno sa imbestigasyon sang Surallah PNP Traffic Section, sakay ang mag-asawa sang isa ka tricycle padulong kuntani sa sentro sang banwa sang ini mabunggo sang isa ka Nissan Navarra pick-up nga may plate number LAF 8903, nga ginamaneho sang lalaki nga ginkilala lang sa alyas nga “Nero,” 45 anyos, kag residente sang Davao City.
Ang duha ka biktima nag-angkon sang seryoso nga pilas kag gilayon nga gindangat sa ospital, apang gindeklarar nga patay si Felizardo pag-abot. Padayon pa nga ginabulong ang iya asawa.
Sa karon, ang driver sang pick-up yara na sa kustodiya sang Surallah PNP para sa nagakaigo nga disposisyon.
