KORONADAL CITY – Nagapasalamat ang pamunuan sang Yellow Bus Line Incorporated sa pagka-neutralized sang ginakabig nga mastermind sa pagpasigabong sang IED sa ila nga unit sang damlag lang nga nagresulta sa pagkapilas sang 3 ka mga indibidwal.
Ini ang pahayag ni Mr. Bernard Bolanio, operations manager sang YBL sa Interview sang Bombo Radyo Koronadal.
Suno kay Bolanio, commendable ang ginhimo sang AFP kag PNP bangud madasig nga na-identify ang mga suspek kun diin napatay ang isa sa mga ini.
Dugang pa ni Bolanio, ginapakita lamang sang mga otoridad nga wala sila nagapabaya sa kasubong sini nga mga hitabo.
Apang, padayon man nila nga ginatindugan nga wala sila sang may nabaton nga extortion letter antes pa man nagluntad ang pagpasigabong sang bomba.
Sa karon, mas ginpahugtan pa sang kumbuyuhan ang security measures sa mga terminal kag sa mga pasahero nga nagasaka-panaug sa tanan nila nga mga unit sang bus.
Sa sini nga paagi masiguro ang kaluwasan sang tanan.
Sa karon nagapanawagan ang YBL sa tanan nga mangin alerto kag vigilante agud indi na magluntad liwat ang insidente.
