KORONADAL CITY – Gin-awhag ni Department of Science and Technology o DOST Undersecretary Renato Solidum ang mga pumuluyo nga mangin preparado anuman nga oras ilabi na sa isla sang Mindanao makaligad ang mga napagkit nga asud-asod nga mga aftershocks nga naglab-ot sa masobra 500 makaligad ang pag-igo sang Magnitude 6.3 nga linog sang miyerkules sang gab-i.
Sa interbyu sang Bombo Radyo Koronadal kay DOST Undersecretary Solidum, pinakamabaskog nga aftershock ang napagkit kagaina sang aga pasado alas 6 sang aga sang naglab-ot sa Magnitude 5.0 kun sa diin ang sentro sa gihapon sini ang Tulunan, North Cotabato.
Nabatyagan man ang Intensity IV sa Kidapawan City samtang sa Instrumental Intensities nakapagkit naman sang Intensity IV sa Malungon, Sarangani; Koronadal City, South Cotabato, Intensity III sa General Santos City; Alabel, Sarangani; Tupi, South Cotabato kag Intensity I sa Kiamba, Sarangani.
Indi man suno pa dapat pabay-an ang mga mahuyang nga linog nga napagkit bangud possible nga sinyales ini sang palaabuton pa nga mas mabaskog nga mga linog.
Gin-awhag naman ni Solidum ang mga pumuluyo nga usaron ang Hazard Hunter mobile app sang DOST nga isa ka fault finder application nga sarang matumod ang mga lugar nga may matag-as nga risgo sa tion nga may mga mapagkit nga linog
