KORONADAL CITY – Naarestar sa gintingob nga puwersa sang Tantangan Municipal Police Station kag South Cotabato Police Mobile Force company ang isa ka mangunguma nga wanted person makaligad suno pa nga makakuha sang cash assistance halin sa Social Amelioration Program sang DSWD sa bahin sang Brgy. Bukaypait,Tantangan, South Cotabto.
Ginkilala ang suspek kay Rocky Bakal Dondi, 49 anyos, may asawa, mangunguma kag residente sang Prk. Bagong Silang, sa nasambit nga banwa.
Ginarestar ini sang mga otoridad sa bisa sang warrant of arrest nga ginpaguwa ni Hon. Felix S. Mesa sang Regional Trial Court Branch 26, Surallah, South Cotabato sang Hunyo 25,2018 sa kaso nga attempted murder kag may bail bond nga P120,000 pesos.
Nagpanguna sa pag-arestar kay Dondi ang pulis nga nagpakuno kuno nga staff sang DSWD nga nagapanghatag sang cash aid sa mga pumulyo nga apektado sang enhanced community quarantine.
Gin-arestar man ng mga pulis, ginhatag sa gihapon sang DSWD ang P5,000 pesos nga ayuda sa Social amelioration program.
Sa subong, yara sa custodial facility sang Tantangan PNP ang nasambit nga suspek.
