Ginaluman nga magsumiter si Vice President Sara Duterte sang iya sabat sa duha ka impeachment complaints batok sa iya sa Lunes, Marso 16, matapos ideklarar sang House Committee on Justice nga may bastante nga porma kag kaundan ang mga reklamo.
Suno kay Rep. Terry Ridon, miembro sang komite, matapos ang 10 ka adlaw nga palugit nga ginpahamtang sa Bise Presidente, magahatag sang oportunidad ang komite sa mga nag-endorso sang impeachment para magsabat, kag pagkatapos, pagahatagan man sang rejoinder si VP Sara.
Pagkatapos sang pag-submit sang sabat, tukibon sang komite kun “sufficient in grounds” ang mga reklamo kag ginalauman nga magahiwat sang hearing proper sa Abril 8.
Ginpahayag man ni Rep. Ridon nga kun indi magsumiter sang sabat si VP Sara sa Lunes, mahimo nga mapadali ang proseso sang impeachment.
Ginsukot niya ang akusasyon sang Bise Presidente nga ini isa ka “fishing expedition” kag ginpasiguro nga kompleto na ang mga dokumento para magpadayon ang impeachment.
Ang sunod nga hearing sang Justice Committee naka-schedule sa Marso 18, kun sa diin pagahisgutan ang mosyon ni Rep. Chel Diokno bahin sa posible nga conflict of interest sang mga abogado ni VP Sara, sanday Atty. Reynold Munsayac kag Atty. Michael Poa.
