KORONADAL CITY- Isa ka anay Kapitan kag Vice Mayoralty Candidate ang napatay matapos nga ginluthang patay sa sulod sang iya puluy-an sa bahin sang Brgy. Bukay Pait sa banwa sang Tantangan, South Cotabato sang gab- i sang Nobyembre 17, 2024.
Ini ang ginkumpirma ni Pol. Maj. Erika Vallejo, Hepe sang Tantangan PNP sa interbyu sang Bombo Radyo Koronadal.
Ginkilala ni Vallejo ang biktima nga si Jose “Bobot” Osorio, 58 anyos, kasado, anay Punong Barangay kag residente sang Purok Maligaya Brgy.Bukay Pait kag nagadalagan bilang Bise Mayor sa banwa sang Tantangan para sa 2025 National kag Local Elections.
Suno sa inisyal nga imbestigasyon sang Tantangan PNP, gabi pa pasado 10:00 sang nagluntad ang pag pangluthang patay kag nakit-an na ang biktima sang 6:00 sang aga nga nahibaluan nga ginsulod sang wala pa makilal-an nga mga suspek ang puluy-an ni Osario kag ginluthang patay gamit ang caliber 45 nga armas luthang.
Narekober naman sa crime scene ang 6 ka mga basyo.
Sa karun ang patay nga lawas sang biktima ang nagapabilin sa paghinakop sang Rest Haven Funeral Homes sa Brgy.New Ilo-Ilo sa banwa sang Tantangan para sa pagpatigayon sang Postmortem Examination.
Suno naman kay Elsie Osorio, asawa sang biktima nga nag tawag pa ini sang 12:56 sang kaagahon para ichekyar kung diin ang iya nga asawa bangud wala ini sa iya nga tupad kag ginbalewala ini bangud sa rason nga gin-isip ni Elsie nga nag preparar ini para sa kapehan sa aga.
Nakit-an sang taga-luto nila sang pagka aga nga nakahigda ini sa ila kusina.
Samtang pag chekyar ni Elsie sang mga tiil sang biktima, lamig na ini.
Nagapanawagan man ini sa suspek kung ano gid ang motibo sini sa biktima kag sa karon hindi pa mahunahuna ang pag ka patay sang iya asawa.
Naga padayon sa gihapon ang imbestigasyon sang Tantangan PNP sa pagkilala sa mga suspek kag paghibalo sa motibo sa krimen kag kung may mga impormasyon man nga may kaangot sa insidente, mag report sa kapulisan agud makabulig sa imbestigasyon.
Ang nasambit nga biktima isa ka anay kapitan sang Brgy. Bukay Pait nga si Jose “Bobot” Osorio kag isa ka kandidato sa Bise Mayor sa Banwa sang Tantangan sa umalabot nga 2025 National kag Local Elections.
Magahatag man sang padya si Congressman Peter B. Miguel nga mag hatag sang Php1 milyon reward kung sino man nga makatudlo ukon makahatag sng suspek sa nasambit nga pagpangluthang patay kay Tantangan Vice Mayoralty Jose Osorio.
