Nanawagan ang pila ka Democratic lawmakers sa Estados Unidos kay US President Donald Trump nga paligonon ang suporta sang Washington sa Pilipinas, sa tunga sang padayon nga paghilabot sang China sa West Philippine Sea.
Suno sa mga mambabatas, sobra ang pagtamod sang administrasyon sa mga girra sa Middle East, nga nagahatag sang higayon sa Beijing nga mapalapad ang iya presensya sa rehiyon.
Ginpabutyag ni Rep. Eugene Vindman nga dapat ibalhin ang pokus sang Estados Unidos gikan sa ginatawag niya nga “unwinnable wars” kag tutukan ang pagdepensa sa internasyonal nga mga lagda, labi na sa West Philippine Sea.
Bisan pabor sa Pilipinas ang 2016 Arbitral Award, padayon nga ginasikway ini sang China, nga bag-o lang nagbutang sang floating structure sa Scarborough Shoal, isa ka tikang nga ginpakamalain sang Manila.
Samtang, ginpakita sang survey nga 86% sang mga Pilipino ang nagapati nga dapat depensahan sang gobyerno ang West Philippine Sea upod ang mga kaalyado nga pungsod.
Nagpaandam ang mga lawmakers nga kon indi dayon maglihok ang Washington, mahimo ini magpakita sang maluya nga commitment sang Estados Unidos sa rehiyon, nga posible magpalig-on pa gid sang posisyon sang China.
