KORONADAL CITY – Ginarespeto sang mga otoridad ang pagpatuman sang iban nga pungsod sang travel advisory kasunod sang nagluntad nga pagpamomba sa Cotabato City nga ginkapatay sang duha ka tawo kag ginkapilas sang masobra 30 nga iban pa.
Suno kay PSupt. Aldrin Gonzales, spokesman sang PNP-12 sa interbyu sang Bombo Radyo Koronadal, normal lamang nga himoon ini sang iban nga pungsod agud mapabilin ang kaluwasan sang ila mga kasimanwa diri sa Mindanao.
Ginpasiguro man sang opisyal nga ginahimo nila ang tanan agud magpanumbalik sa normal ang sitwasyon sa lugar.
Kaangot sini, nagapanawagan man siya sa publiko nga magbantay kag gilayon nga isugid sa mga otoridad ang anuman nga makaduloda nga mga butang ukon tawo.
Sa pihak nga bahin, ginpasiguro man sang PNP ang hugot nga seguridad sa nagahilapit nga plebesito sang Bangsamoro Organic Law sa Enero 21, kun sa diin maga-deploy sila sang dugang nga pwersa halin sa regional headquarters.
