Ginkalipay sang Transport Network Vehicle Service (TNVS) groups ang tikang sang gobyerno sa pagpanagtag sang ‘cash relief’ sa mga drayber, apang ginpahayag nila nga kinahanglan pa gihapon sang pangmadugay nga solusyon ang epekto sang pagsaka sang presyo sang gatong.
Suno sa grupo nga TNVS Community Philippines, indi dapat nakadepende lang ang gobyerno sa temporasryo nga remedyo.
Ginpahayag nila nga luwas sa cash relief, hingyo nila nga panibaguhon ukon taasan ang base fares sang 20 piso sa tanan nga kategorya sang serbisyo.
Ginpaabot mismo sang tigpanguna sang grupo nga si Walter Lugay ang ila mga hingyo sa administrasyon.
Dugang pa niya, simple lamang ang tinguha sang TNVS Community Philippines amo ang pagpatuman sang patas nga sistema sa transportasyon, kun sa diin ang mga drayber makabaton sang akma nga kita kag makabiyahe sang luwas ang mga pasahero.
Gin-ako man ni Lugay kag ang driver-operator nga si Arlyn Camorongan nga tuma sila nga naapektuhan sang pagsaka sang presyo sang gatong.
Suno sa ila, samtang nagapadayon ang mga temporaryo nga solusyon, kinahanglan sang mas estratehiko nga tikang agud masiguro nga indi malugi ang mga drayber kag masiguro ang dayunon nga serbisyo sa publiko.
