Dako ang epekto sang padayon nga tensyon kag kinagamo sa Middle East sa transport industry bangud nagaresulta ini sa pagsaka sang presyo sang gatong sa world market.
Sa interview sang Bombo Radyo Koronadal kay Bernard Bolanio, Operations Manager sang YBL Inc., ginpahayag niya nga bisan sini nga sitwasyon, wala pa sang plano ang kompanya nga magpatuman sang pagsaka sang plete agud maproteheran ang ila mga pasahero.
Ginpahayag niya nga pareho nga apektado sang pagsaka sang presyo sang gatong ang mga pasahero kag ang bus company.
Sa pihak sini, ginpasiguro niya nga ginahatagan gihapon sang prayoridad sang YBL ang kaluwasan kag maayo nga kahimtangan sang ila mga pasahero.
Agud makabulig sa pagtipid sang gatong, nagapangita ang kompanya sang mga pamaagi pareho sang pagminos sang paggamit sang aircon sa ila mga bus kag iban pa nga fuel-saving measures.
Dugang pa ni Bolanio, naga depende gihapon ang pagpatuman sang pagtaas sang pamasahe sa mandato sang LTFRB, nga amo ang nagaregulate sang plete sa public transportation.
Kinahanglan anay nga hatagan sila sang provisional fare increase antes sila makapahamtang sang bag-o nga plete.
