KORONADAL CITY – Nagapadayon ang imbestigasyon sang Bureau of Fire Protection (BFP)- Koronadal kag ang kabug-osan nga balor sang damyos angot sa nagluntad nga sunog sa bahin sang Datu Piang St., Brgy Zone 4, Koronadal City kaina sang kaagahon.
Base sa imbestigasyon, nagluntad ang sunog pasado alas 12 sang kaagahon kun sa diin suno sa mga residente, may nabatian suno pa sila sang mga serye sang pagsigabong antes naglapta ang kalayo kag tigayon nga gindalasa ang dressing shop, electronic shop, kag restaurant.
Tuman naman ang pagsalbar sang mga tawo sang ila mga kagamitan sa kahadlok nga malamita ang ila panimalay sang sunog.
Suno kay ginang Helen, nga naga-manage sa dressing shop sang iya bata, ginpukaw siya sang nagalapta na ang kalayo kag sang paglantaw niya sa palibot nagadaba-daba na ang kalayo sa kilid nga bahin.
Dali-dali naman sila nga nagguwa apang wala sila sang may nasalbar nga kagamitan.
Ginabulobanta suno pa nga nagalab-ot sa P1 milyon ang damyos sa dressing shop labi pa nga bag-o lamang nila ini nga na-renovate.
Suno kay Elizer Sadiangabay nga nagapanag-iya sang nasambit nga shop, ginpasiguro sini nga nakapatay ang plangka nila humalin sang ginpatuman ang lockdown sa siyudad.
Wala man suno pa sang may nagatulog diri apang padayon ang pagbantay niya sa iya negosyo.
Yara suno pa sa P300,000 tubtob P400,000 ang damyos nga natuga sang sunog sa iya negosyo.
Ginpasiguro naman ni Koronadal Mayor Eliordo Ogena nga pagabuligan ang naapektohan nga mga residente sa nasambit nga sunog.
