Ginmando ni Presidente Ferdinand Marcos Jr. sa Department of Energy (DOE) nga siguruhon nga nagakaigo ang supply sang langis sa mga lugar nga maigo sang Super Typhoon Pepito.
Magluwas sa supply sang langis, gusto man masiguro ni Marcos nga may nagakaigo nga supply sang mga nagapanguna nga kinahanglanon kag kuryente.
Magluwas kay Pepito, nag-igo man sa pungsod ang sunod-sunod nga Bagyo Marce, Nika, kag Ofel.
Apang sa pihak sini, bastante na man ang supply sang langis sa mga naigo nga lugar parehos sang Ilocos, Cagayan Valley regions kag Cordillera Administrative Region (CAR).
Nagpatuman man ang gobyerno sang price freeze sa Liquefied Petroleum Gas (LPG) kag kerosene products.
Magapabilin ang price freeze sang 15 ka adlaw kun nagdeklara sang state of calamity.
Sa karun ginpaidalom sa state of calamity ang Cabagan, Isabela; Dilasag, Aurora; kag Paracelis, Mountain Province.
