KORONADAL CITY – Tuman nga ginkasubo sang Western Mindanao Command ang nagluntad nga ginaaligar nga misencounter sa bahin sang Jolo sa probinsya sang Sulu nga ginkapatay sang apat ka katapo sang Philippine Army.
Sa eksklusibo nga interbyu sang Bombo Radyo Koronadal kay Wesmincom spokesperson Major Arvin Encinas, wala nila ginalauman kag ginkakibot ang nagluntad nga engkwentro sa tunga sang mga kapulisan kag mga kasuldadohan nga nagresulta sa pagkapatay sang apat ka katapo sang Philippine Army.
Suno kay Encinas, yara suno pa sa isa ka official function ang nasambit nga mga suldado sang nagluntad ang panghitabo.
Kaangot sini, ginpasiguro sini sa gihapon nga maayo sa gihapon ang pagtamdanay sang PNP kag Philippine Army sa pihak sang natabo.
Nagaapela man ini sa mga netizens nga indi pag-i-sensationalize ukon padakuon ang nasambit nga isyu kag hulaton na lamang ang opisyal nga pahayag halin sa NBI.
Madumdoman nga ginhangyo ni Wesmincom commander Lt. Gen. Cirilito Sobejana ang National Bureau of Investigation nga pangunahan ang imbestigasyon agud nga matumod ang natabo.
Nagalaum man ini nga sa madali nga tion maangkon gilayon ang hustisya kag maathagan ang tanan.
