KORONADAL CITY – Patay ang isa ka ginapatihan nga sub-leader sang local terrorist nga Bangsamoro Islamic Freedom Fighters (BIFF) sa ginpatigayon nga military operation sa marshland sang Maguindanao del Sur.
Ini ang ginkumpirma rni Lt. Col. Roden Orbon, spokesperson sang 6th ID, Philippine Army sa interview sang Bombo Radyo Koronadal.
Suno kay Orbon, nakaengkwentro sang mga suldado ang yara sa masobra napulo ka mga terorista sa Barangay Butilen, Datu Salibo, Maguindanao del Sur nga nagdugay sang masobra lima ka minutos.
Ang nasambit nga engkwentro ang gintunaan sang kamatayon sang Sub-leader sang BIFF nga ginapatihan naga-training sang mga myembro sini agud mangin bomber.
Dugang pa sang opisyal, narekober man sa lugar nga ginluntaran sang engkwentro ang mga highpowered firearms, war materials kag mga subersibo nga dokumento.
Isa ka residente ang nagreport sa militar nga nakita nila ang presensiya sang BIFF sa lugar rason nga nagpatigayon sila sang operasyon.
Apang sa baylo nga magsungka sang matawhay nagbato ang mga ini sa mga otoridad nga nagresulta sa kamatayon sang high ranking official sang BIFF.
Nahibaluan nga may existing nga warrant of arrest sa kaso nga extortion, pagpamomba kag iban pa nga illegal nga aktibidad ang napatay nga BIFF leader.
