Gin-anunsyo sang Social Security System (SSS) ang appointment ni Commissioner Robert Joseph De Claro bilang bag-o nga Officer-in-Charge, epektibo Oktubre 11, 2024.
Ini ang nangin desisyon sang Social Security Commission (SSC) kasunod sa pagbiya sa pwesto ni Rolando Ledesma Macasaet bilang presidente sang tinalikdan nga bulan.
Nahibaluan nga nag-alagad si De Claro sa SSC halin sang Enero 11, 2023, nga nagarepresentar sa Employers’ Group nga ginalantaw nagpabakod sang background sini agud mangin OIC sang nasambit nga ahensya.
Magluwas dire, nangin katapo man sang board sang UnionBank (UBP) kag UnionBank Investment and Trust Corp. (UBIMTC) kag katapo sang Executive Committee (ExCom), Governance and Risk Committees sini halin sang 2023 si De Claro.
Sa pihak nga bahin, nagbiya sa pwesto si Macasaet matapos ginbaton ang nominasyon sang SSS-GSIS Pensyonado party-list nga magapapili sa House seat sa May 2025 elections.
