KORONADAL CITY – Nagdihon na sang Special Investigation Task Group (SITG) ang kapulisan nga magatutok sa sin-u-man nga responsable sa pagpasigabong sang IED sa Yello bus.
Ini ang ginkumpirmar ni Police Lt. Col. Joedy Lito Gusinga, hepe sang Koronadal City Police Station sa interview sang Bombo Radyo Koronadal.
Suno kay Guisinga, isa-isa naman nga gina-identify sa karon ang IED components nga nakuha sang EOD team sa area paagi sa ila gindihon nga post blast investigastion.
Suno pa sa opisyal, indi pa matudlo sa karon ang grupo nga may kahimuan sang pagpasigabong apang dako ang mabulig sang kuha nga CCTV footage kag ang statement sang driver, konduktor kag mga pasahero.
Dugang pa ni Guisinga, ang gindihon nga SITG ang nagapanguna subong sa pag-imbestigar agud gilayon nga matumod ang responsable sa pagbutang sang bomba kag mapasabat sa ginhimo sini nga krimen.
