KORONADAL CITY – Ginsabat na ni South Cotabato Gov. Reynaldo Tamayo Jr ang isyu angot sa nadelatar nga sweldo sang mga katapo sang Provincial School Board.
Suno kay Governor Reynaldo Tamayo Jr, nagpatigayon sila sang massive hiring kun sa diin ila ginkuha ang 200 ka mga manunudlo agud mahatagan sang tyansa ang mga bag-o gradwar nga makaobra sa idalom sang Provincial School Board.
Ginpahayag ni Tamayo nga ang rason ngaa nadelatar ang ila sweldo ang bangud kulang ang ila mga rekisitos nga ginsumiter kasubong sang DTR, SSS, Philhealth kag iban pa.
Kada batch man suno pa ang paghatag sang payroll kag padayon man ang iya pahanumdom nga kumpletuhon sang mga ini ang ila mga dokumento bangud madamo pa sa ila ang kulang ang rekisitos rason nga wala na-release ang ila mga sweldo.
Ginpaathag ni Governor Tamayo nga may yara sang nagakaigo nga pondo ang gobyerno probinsyal para sa ila mga empleyado.
Kasunod ini sa pagpalab-ot sang reklamo sa Bombo Radyo sang pila ka miyembro sang Provincial School Board bangud sa pagkadelatar sang ila mga sweldo humalin pa sadtong Agosto.
Suno kay Gov. Tamayo, kinahanglan nga makumpleto sang mga ini ang mga rekisitos nga gintalana nga isumiter sang mga manunudlo antes makapaguwa sang kwarta.
Natyempohan lang suno pa nga wala nasweldohan ang mga ini bangud may duha ka mga indbidwal nga may kulang nga mga dokumento rason nga nagaawhag ini nga kumpletuhon gid ang ila mga dokumento kag rekisitos agud mapadasig ang pagkuha nila sang ila mga sweldo.
Ginpaklaro man sini nga ginahimo sang gobyerno ang tanan para sa ila mga constituents gani sa sini nga isyu, yara sa mga empleyado ang kakulangon kag indi sa provincial government.
