Posible nga amyendahan sang Senado ang ila rules agud magpataw sang silot sa mga senador nga wala nagatambong sa sesyon, suno kay Sen. JV Ejercito.
Ini sunod sa ethics complaint batok kay Sen. Ronald “Bato” Dela Rosa bangud sa malawig niya nga indi pagtambong sa mga sesyon sa senadao.
Bilang chair sang Senate Ethics Committee, ginpahayag ni Ejercito nga ang amendment mahimo ipatuman paagi sa Rules Committee kag kinahanglan aprubahan sang plenaryo.
Suno pa sa iya, wala ini na-anticipate antes nga may legislator nga indi magsulod, gani kinahanglan bag-uhon ang rules sang bug-os nga Senado.
Ang reklamo batok kay Dela Rosa ang ginpasang-at sang civil society group nga Wag Kang KuCorrupt, apang posible ini madismiss bangud wala pa sang nagaluntad nga palasundan kasubong sang “no work, no pay.”
Madumduman nga wala na nakatambong sa sesyon si Dela Rosa halin Nobyembre 11 sang nagligad nga tuig, matapos ginpahayag ni Ombudsman Boying Remulla nga may warrant of arrest batok sa iya ang International Criminal Court (ICC), nga nagatudlo sa iya bilang isa sa mga ginakabig nga responsable sa extrajudicial killings sa war on drugs sang anay Presidente Rodrigo Duterte.
