Ginpamatbatan nga guilty kag penalidad nga “reclusion perpetua” ukon pagkapreso sang tubtob 40 ka tuig kag muta nga P10milyon pesos ang “self-confessed killer” sang isa ka doktor sa syudad sang Cotabato.
Ini ang ginpaguwa nga desisyon sang RTC Branch 14 kay Nasrudin Mohammad Endaila alyas Nadine bangud sa kaso nga murder nga ginaatubang sini.
Si Endaila ang nagpatay kay Dr. Maria Vicenta ukon Marivic Tello nga ginlubong sa nalikod nga bahin sang Cotabato City Medical Society Building sang Cotabato Regional and Medical Center sang Hulyo sang tinalikdan nga tuig.
Madumduman nga gin-admiter sang suspek nga ginpatay niya ang doktora samtang nagapahuway ini sa conference hall kag ginlubong nga nagaisahanon.
Sa nangin pag-ako sang suspek, nadulom suno pa ang panan-awan sini matapos nga ginpasibangdan sang doktora nga nagkuha sang collection nila nga kwarta nga nagakantidad sang P20,000.
