KORONADAL CITY – Pagahibaluon sang mga otoridad kun may foul play angot sa kamatayon sang isa ka security guard nga nagabantay sa isa ka bodega sang Landbank sa bahin sang Brgy. Concepcion, Koronadal City.
Ginkilala ang napatay nga si Aristo Mileyor, yara sa legal nga edad kag madugay na nga nagabantay sa nasambit nga bodega.
Sa interbyu sang Bombo Radyo Koronadal sa upod sini nga guwaridya nga si Roger Dalipe, tuman ang iya katingala nga mahipos ang palibot kag sirado pa ang pirtahan sang bodega sang nag-abot ini agud nga magbulos duty kay Mileyor.
Kag sang gintinguha niya nga abrihan ang pirtahan, nakita niya si Mileyor sa ila outpost nga nakahigda na kag nagapamutla nga wala sang kabuhi.
Bangud sa iya nasaksihan, gilayon niya nga ginpalab-ot ang impormasyon sa barangay nga amo naman ang nagtawag sa kapulisan agud imbestigaran ang natabo.
Gintawagan niya man ang pamilya sini kag ang talatapan sang Landbank mangin ang ila security agency angot sa nadangtan sang biktima.
Suno kay Dalipe, posible suno pa nga gin-atake sang balatian si Mileyor kun sa diin sang nakaligad ikaduha na ini nga gin-atake.
