Mariing pinabulaanan ni Tingog Party-list Rep. Jude Acidre ang mga akusasyong nag-uugnay kay dating House Speaker at Leyte Representative Martin Romualdez sa anumang anomalya, matapos linawin ng Independent Commission for Infrastructure (ICI) na wala silang nakitang basehan para idiin ang mambabatas.
Ayon kay Acidre, mismong ang referral na nilagdaan ni retired Supreme Court Justice Andres Reyes ang nagsasaad na walang anumang “finding or conclusion of guilt” laban kay Romualdez, kabaligtaran sa ipinapakalat na ulat ni Navotas Rep. Toby Tiangco.
Aniya: “The ICI referral itself, signed by retired Supreme Court Justice Andres Reyes, explicitly states: ‘This referral is issued without any finding or conclusion of guilt or liability on the part of Former Speaker Ferdinand Martin G. Romualdez. That is not interpretation. That is the Commission’s own language.”
Binweltahan din ni Acidre si Tiangco sa diumano’y pagpapakalat ng maling impormasyon na ginamit ang mga ayuda tulad ng AICS, AKAP, at TUPAD para “suhulan” ang mga mambabatas na lumagda sa impeachment complaint laban kay Vice President Sara Duterte.
