Ginpanawagan ni House impeachment prosecutor kag Bicol Saro Rep. Terry Ridon si Vice President Sara Duterte nga untatan na ang iya ginatawag nga “drama” nahanungod sa iya kabalaka sa seguridad kag sa baylo atubangon ang kaso nga grave threats batok sa iya paagi sa husto nga proseso sang balaod.
Ginpahayag ini ni Ridon matapos magsiling si VP Duterte nga nahadlok siya para sa iya seguridad kag nagapangutana kun sin-o ang manabat kon may malain nga matabo sa iya.
Sa sabat ni Ridon sa pamangkot ni VP Sara kun sin-o ang manabat, nagsiling ini, “Kamo po, Madam Vice President.”
Gi-igiit ni Ridon nga dapat mag-atubang si Duterte kag magsabat sa mga alegasyon nga ginpasaka batok sa iya. Suno sa mambabatas, kinahanglan nga sundon ang proseso sang balaod kag indi gamiton ang iya mga kabalaka sa seguridad bilang paagi sa paglikaw sa kaso.
Nagsugod ang kaso sa mga pahayag ni VP Sara nga may ginmandoan na siya nga isa ka tawo nga patyon si Pangulong Ferdinand Marcos Jr., First Lady Liza Araneta-Marcos kag anay House Speaker Martin Romualdez kon may matabo sa iya.
Bangud sini, nagpagwa ang Quezon City Regional Trial Court sang warrant of arrest batok kay VP Sara matapos makit-an nga may probable cause sa tatlo ka counts sang grave threats. Gin-set ang piyansa sa P120,000 sa kada kaso ukon kabug-usan nga P360,000.
Ginpahayag man ni Ridon nga separado ang criminal case sa impeachment trial ni VP Duterte sa Senado. Apang, ang alegasyon may kaangtanan man sa impeachment case, ilabi na ang mga ginapahayag nga pagpanghulga batok kay Pangulong Marcos, First Lady Araneta-Marcos kag Romualdez.
