KORONADAL CITY – Ginpasiguro sang Regional Development Council (RDC)-12 nga magahimo sila sang tikang agud nga mapasabat ang mga yara sa likod sang Kabus Padatuon Ministry International Inc. (KAPA) nga padayon ang operasyon sa nagkalain-lain nga lugar sa Rehiyon 12.
Sa eksklusibo nga interbyu sang Bombo Radyo Koronadal kay National Economic Development Authority Asst. Regional Director Noel Quiratman,ginahulat na lamang nila ang pormal nga reklamo batuk sa KAPA nga gindihon ni Joel Apolinario.
Aminado si Quiratman nga may basehan ang una nga memorandum nga ginpaguwa sang Securities and Exchange Commission (SEC) kag Department of Interior and Local Government (DILG).
Suno pa kay Quiratman, makaalarma ang operasyon sang KAPA bangud makabig nga economic sabotage ang ginahimo sang mga ini nga pagpangolekta sang kwarta kabaylo sang 30 percent nga interes kada bulan.
Makumparar suno pa ini sa money laundering kun diin ginakawat ang kwarta sang mga tawo nga may negatibo nga epekto naman sa economic development sang rehiyon.
