Mas nagabug-at ang kabuhi sang mga PUV driver bangud sa padayon nga pagsaka sang presyo sang krudo.
Ini ang nangin pahayag ni Arnold Calawigan, Public Utility Vehicle driver, sa interview sang Bombo Radyo Koronadal.
Suno kay Calawigan, halos sa krudo na lang nagakadto ang ila adlaw-adlaw nga kita sa pagpamasada.
Gindugang pa niya nga kun magpadayon pa ang pagsaka kag maglab-ot sa P100 ang sobra nga presyo sang krudo, posible nga wala na gid sila may mabilin para sa ila pamilya.
Ginpahayag man niya nga sang una, may mauli pa siya nga P300 tubtob P500 kada adlaw para sa iya pamilya, apang subong, nagakabuhin na lang ini sa mga P150, nga indi na insakto sa panginahanglan sang iya pamilya.
Bangud sini, nagapanawagan man si Calawigan sa gobyerno nga untaton ukon mapahagan-haganon ang pagsaka sang presyo sang gatong kag ginpangabay man niya ang paghangop halin sa mga pasahero, kag nagapasalamat sa mga nagadugang pamasahe agud mabuligan ang mga driver sa tunga sang nagapadayon nga krisis sa pungsod.
