Liwat nga ginapapreparar ang mga motorista sa igapatuman nga panibag-o nga pagsaka sa presyo sang mga produkto nga petrolyo sa masunod nga semana nga posible mag-abot tubtob ₱16 kada litro kun diin ginabanta naman nga magasaka na sa P100 pesos kada litro ang diesel.
Ini ang epekto sang padayon nga geopolitical conflict nga nagalabot sa Estados Unidos, Israel, kag Iran.
Base sa apat ka adlaw nga pagmonitor sa trading sa Mean of Platts Singapore, ginapaabot ang pagtaas sang presyo sang diesel sa ₱16 kada litro, gasolina nga ₱11 kada litro, kag kerosene nga ₱3.50 kada litro.
Suno kay Department of Energy Secretary Sharon Garin, ginhangyo sang ahensya ang mga gasolinahan nga utay-utayon nga ipatuman ang price increase, kag magpadayon sa mga discount promos agud maminusan ang epekto sini sa publiko.
Ginpahayag man ni Garin nga may igo nga suplay sang langis ang pungsod tubtob Abril, o mga 50 ka adlaw pa, samtang nagapadayon ang koordinasyon sang gobyerno sa mga oil companies agud maseguro ang madasig kag mas barato nga suplay.
