Ginpahayag sang Philippine Statistics Authority (PSA) nga ginalauman ang pagnubo sang retail price sa kada kilo sang bugas subong nga bulan sang Agosto bangud sang gintingob nga base effects kag pagpanubo sang taripa sa mga imported nga binhi.
Suno kay PSA chief Claire Dennis Mapa, nagasugod na ang pagpanubo sang taripa rason nga posible na nga mabatyagan ang dako nga pagnubo sa presyo sang bugas subong nga bulan.
Sang nagligad nga Hulyo, ginpatuman ang pagpanubo sang tariff rates sa mga imported nga bugas sa 15% halin sa anay 35% sa idalom sang Executive Order No. 62.
Matandaan nga una na nga ginpahayag sang PSA nga ang pagnubo sang taripa para sa imported grain staple ang mahimo makabuhin sang P6 tubtob P7 sa kada kilo sa presyo sang bugas.
Magluwas sang EO 62, ginpa-athag man sang opisyal nga ang “base effects” ang mahimo maka-apekto man sa pagpanubo sang presyo sang bugas sini nga bulan.
Sa pihak nga bahin, agud nga mapahagan-hagan ang palaligban sang mga konsumidor bangud sang mataas nga presyo sang bugas, naglunsyar ang Department of Agriculture (DA) sang Rice-for-All program sang nagligad nga Agosto 1 kun sa din mahimo makabakal ang publiko sang bugas sa P45 kada kilo sa mga pila ka Kadiwa outlets.
