Nagpahayag ang Meat Importers and Traders Association (MITA) nga bisan ginpalapad sang Executive Order No. 116 ang pork import quota, wala gilayon nagpanubo ang retail prices bangud sang ginatawag niya nga “sticky pricing,” kun sa diin nagahulat anay ang mga retailers nga masiguro nga permanente ang pagnubo sang presyo antes sila magpanubo sang presyo sang ila baligya.
Suno sa asosasyon, kinahanglan sang padayon nga suplay kag presyur sa merkado antes magpanubo ang presyo sang karne sa mga palengke kag supermarket.
Ginkwestyon man nila kun may igo nga cold storage kag pasilidad ang gobyerno para madumalahan ang mas dako nga imported pork nga ginapaabot nga ibaligya sa mga Kadiwa outlets.
Sa pihak sang rekord nga pork imports kag mas dako nga kita sang gobyerno halin sa tariffs, ginpabutyag nila nga mahal sa gihapon ang baboy para sa kadam-an sang mga Pilipino.
Dugang pa niya, kinahanglan nga usaron ang imports bilang temporaryo nga bulig samtang ginapabakod liwat ang lokal nga hog industry nga padayon nga nagaagom sang epekto sang African Swine Fever (ASF).
